ក្នុងនោះដែរយើងសង្គេតឃើញថា មានអាណាព្យាបាលយ៉ាងច្រើនកុះករបាននាំកូនៗ មកចូលរួមកម្មវិធីប្រគល់វិញ្ញាបនបត្រ បញ្ចប់ការសិក្សាថ្នាក់មត្តេយ្យ ដោយទឹកមុខសប្បាយរីករាយ។
អ្នកស្រី សោម សុវណ្ណលីនដា ដែលជាអាណាព្យាបាល បាននាំកូនមកចូលរួមកម្មវិធីនេះ បានបង្ហាញពីចំណាប់អារម្មណ៍ របស់ខ្លួនដូច្នេះថា ខ្លួនពិតជាមានក្តីរំភើប និងទទួលបាននូវភាពកក់ក្តៅជាខ្លាំងនៅពេលដែលលោកស្រីបានអញ្ជើញចូលរួមក្នុងព្រឹត្តិការណ៍ដ៏សែនមានអត្ថន័យនេះ លោកស្រីបានបន្តថា ខ្លួនមានការវាយតម្លៃខ្ពស់ចំពោះលោកគ្រូ អ្នកគ្រូ នៃសាលារៀន AIS ក្នុងការយកចិត្តទុកដាក់ ព្រមទាំងបានមើលថែកូនៗបានយ៉ាងល្អ។
រីឯអ្នកស្រី តង់ ក្រឹម ដែលជាគ្រូបង្រៀន ថ្នាក់មតេ្តយ្យសិក្សានៃសាលារៀនអន្តរទ្វីប អាមេរិចកាំង សាខាទួលគោក បានលោកឡើងពីសកម្មភាព ព្រមទាំងវិធីសាស្ត្រក្នុងពេលបង្រៀនទៅដល់កូនៗនៃអ្នកអាណាព្យាបាល យ៉ាងដូច្នេះថា ដើម្បីបំពេញនូវតម្រូវការសិក្សា និងការបត់បែនរបស់សង្គមបច្ចុប្បន្ននេះ សាលារៀនរបស់ខ្លួនបានបន្តខិតខំយកចិត្តទុកដាក់ធ្វើយ៉ាងណាឱ្យប្រាកដថា សិស្សានុសិស្សដែលបានបញ្ចប់ការសិក្សានៅសាលារៀន អន្តរទ្វីប អាមេរិកាំង ទាំងអស់ទទួលបាននូវចំណេះដឹង ចំណេះធ្វើ បទពិសោធន៍ សីលធម៌ល្អ ជាពិសេសគឺសិស្សត្រូវមានសមត្ថភាពខ្ពស់ក្នុងការបន្តការសិក្សាបន្តទៅមុខទៀត។
លោក ពៅ ភក្តី ចាងហ្វាង ក្រោមមត្តេយ្យ មត្តេយ្យ និង បឋមសិក្សា សាលារៀនអន្តរទ្វីប អាមេរិកាំង បានថ្លែងថា ក្នុងនាមជាអ្នកផ្តល់ការអប់រំ មិនមែនជារឿងងាយស្រួលនោះទេ ក្នុងការបង្ហាត់បង្រៀនសិស្សានុសិស្ស ឲ្យទទួលបាននៅចំណេះដឹង ពីរបៀបរបបក្នុងការស់នៅ ប្រកបដោយក្រមសីលធម៌ និងសុជីវធម៌ ។
ឆ្លើយតបទៅនឹងការលើកឡើងខាងលើនេះ លោកស្រី រស់ យ៉ាណា ប្រធាននៃសាលារៀន អន្តរទ្វីប អាមេរិកាំង AIS បានឱ្យដឹងថា លោកស្រី មានក្តីត្រេកអរឥតឧបមាដែលកូនៗសិស្សានុសិស្សមានមូលដ្ឋានគ្រឹះនៃចំណេះដឹង និងសមត្ថភាពគ្រប់គ្រាន់ សក្តិសមនឹងទទួលបាននូវវិញ្ញាបនបត្របញ្ចប់ការសិក្សាកម្រិតមត្តេយ្យសិក្សានាឱកាសនេះ។
កម្មវិធីប្រគល់ វិញ្ញាបនបត្រលើកទី២១ ជូនដល់សិស្ស បញ្ចប់ការសិក្សាថ្នាក់មត្តេយ្យ ឆ្នាំសិក្សា២០២១.២០២២ បានប្រព្រិត្តទៅក្រោមបរិយាកាសរីករាយនិងស្និទ្ធស្នាលជាទីបំផុត ដែលមានការបង្ហាញសម្ថភាព ពីប្អូនៗ ធ្វើឲ្យកម្មវិធីប្រព្រិត្តទៅប្រកបដោយអត្ថន័យក្រៃលែង ។
អត្ថបទដោយ៖ មាឃ ចាន់