លោក ចេង ឡៃ អភិបាលស្តីទីខេត្តពោធិ៍សាត់ បានប្រាប់ MJQTV ថា ទីតាំងពហុកីឡដ្ឋានសម្តេចតេជោ ហ៊ុន សែន «SAMDACH HUN SEN SPORT CENTER» នេះអាជ្ញាធរបានចាក់ដី ឈួសជាច្រើនឆ្នាំមកហើយព្រមទាំងទុកឱ្យដីនោះហាប់គ្រប់គ្រាន់ទើបឈានទៅដល់ការសាងសង់ព្រោះដើម្បីការពារការខូតដោយការបាក់ស្រុតណាមួយកើតឡើង។ លោកបន្ថែមថា ក្រៅពីពហុកីឡដ្ឋានក៏មាន សួនកម្សាន្ត និងផ្សារផងដែរ ដោយសារតែនៅទីនោះផ្ទៃដីមានទំហំធំ ព្រមទាំងមិនឆ្ងាយប៉ុន្មានពីទីរួមខេត្តពោធិ៍សាត់។
លោក ចេង ឡៃ ឱ្យដឹងទៀតថា «ប្លង់យើងមានអស់ហើយ ប្លង់គឺយើងសម្រេចគ្នាហើយ ប្រហែលជាដីហ្នឹងវាហាប់ មួយវស្សានេះ វាហាប់ហើយគឺចាប់ផ្ដើមធ្វើគ្រឹះ ធ្វើអីបណ្ដើរៗហើយ »។
យោងតាមកិច្ចប្រជុំរបស់រដ្ឋបាលខេត្តពោធិ៍សាត់នាពេលកន្លងមក គម្រោងពហុកីឡដ្ឋាននេះ នឹងសាងសង់នៅលើផ្ទៃដីប្រមាណ២៥ហិកតា ឬហៅថាដីវាលសម្តេចយស ស្ថិតក្នុងភូមិវាលវង់ ឃុំស្នាអន្សា ស្រុកក្រគរ ខេត្តពោធិ៍សាត់។ ពហុកីឡដ្ឋាននេះ រួមមានទីលានបាល់ទាត់ខ្នាតអន្តរជាតិ, ទីលានមហោស្រព, ទីលានបាល់ទះ, ទីលានបាល់បោះ, ទីលានរត់ប្រណាំង, ទីលានវាយសី, កន្លែងអង្គុយទស្សនា, កន្លែងហាត់ប្រាណ, ប្រព័ន្ធផ្លូវ វាលស្មៅ, កន្លែងក្មេងលេង, កន្លែងអង្គុយលេង, ស្រះទឹក និងកន្លែងចតរថយន្តផងដែរ។
តើតាមការឱ្យដឹងពីប្រជាពលរដ្ឋដែលរស់ក្នុងភូមិវាលវង់នេះ ទីតាំងដែលសាងសង់ពហុកីឡដ្ឋានសម្តេចតេជោ ហ៊ុន សែន នេះ គឺជាអតីតព្រលានយន្តហោះសម្រាប់ដឹកផលនេសាទពីទន្លេសាបយកទៅចែកចាយនៅខេត្តផ្សេងទៀតដែលនៅឆ្ងាយ៕