អ្នកស្រី សុខ ល័ង អ្នកលក់ផ្កាកុលាប និងវត្ថុអនុស្សាវរីយ៍មួយរូបតាមបណ្ដោយផ្លូវ២៧១នៅម្ដុំស្ពានអាកាសស្ទឹងមានជ័យ បានប្រាប់ MJQTV ថា ជារៀងរាល់ឆ្នាំអ្នកស្រីបានបញ្ជាទិញផ្កាកុលាបប្រមាណ១ ០០០ដើម ដើម្បីត្រៀមលក់ក្នុងឱកាសបុណ្យនៃសេចក្តីស្រឡាញ់ ប៉ុន្តែសម្រាប់ឆ្នាំ២០២៣នេះ អ្នកស្រីបានបញ្ជាទិញតែប្រមាណ៥០០ដើមប៉ុណ្ណោះ ព្រោះថា អតិថិជនហាក់ថយចុះ និងមានអ្នកលក់ផ្កាកុលាបនៅតាមផ្លូវច្រើន។ ដោយឡែកសម្រាប់កាដូរអនុស្សាវរីយ៍វិញ អ្នកស្រីឱ្យដឹងថា រាល់ឆ្នាំគឺមានអ្នកលក់បន្តតាមខេត្តកក់ទុកមុនជាបន្តបន្ទាប់ ប៉ុន្តែឆ្នាំនេះហាក់មិនមាននោះទេ ដែលធ្វើឱ្យចំនួនលក់ថយចុះផងដែរ។
អ្នកស្រី វ៉ា សាខន អ្នកលក់វត្ថុអនុស្សាវីយ៍ និងផ្កាកុលាបមួយរូបទៀតនៅមុខផ្សារស្ទឹងមានជ័យថ្មី ឱ្យដឹងថា ឱកាសទិវានៃក្តីស្រឡាញ់នៅឆ្នាំនេះហាក់មានភាពចម្លែកច្រើន ព្រោះមិនមែនមានតែយុវជនដែលទិញផ្កា ឬកាដូអនុស្សាវរីយ៍ជូនគ្នាប៉ុណ្ណោះទេ គឺមានកូនទិញជូនឪពុក ម្ដាយ និងឪពុកម្ដាយ ទិញឱ្យកូនក៏មាន។ ជាមួយគ្នានេះក៏មានផងដែរ ប្តីទិញផ្កា និងកាដូរជូនប្រពន្ធ។
យ៉ាងនេះក្តី អ្នកលក់ផ្កាកុលាប និងវត្ថុអនុស្សាវរីយ៍ទាំង២នាក់អះអាងថា អតិថិជនដែលសម្រុកមកទិញច្រើន គឺនៅថ្ងៃទិវានៃក្តីស្រឡាញ់តែម្ដង ប៉ុន្តែឆ្នាំនេះមិនសូវមានអ្នកទិញនោះទេ បើប្រៀបធៀបគឺខុសគ្នាច្រើនកាលពីឆ្នាំមុនៗ។
យោងតាមឯកសាររបស់គណៈកម្មការស្រាវជ្រាវឯកសារនៃសាលារៀន អន្តរទ្វីប អាមេរិកាំង ឱ្យដឹងថា នៅគ្រិស្តសករាជ២៦៩ មានគ្រិស្តសាសនិកមួយរូប ឈ្មោះ Saint Valentine បានសហការជាមួយមិត្តភក្តិ បន្តជួយរៀបអាពាហ៍ពិពាហ៍ដល់គូស្នេហ៍វ័យក្មេងជាសម្ងាត់។ ប៉ុន្តែទង្វើទាំងនេះត្រូវបានគេរកឃើញ ហើយលោក Valentine ត្រូវបានចាប់ដាក់ពន្ធនាគារធ្វើទារុណកម្មយ៉ាងធ្ងន់ធ្ងរ ។ នៅក្នុងពន្ធនាគារ លោក Valentine បានលួចស្រឡាញ់នារីវ័យក្មេងម្នាក់ ដែលគេជឿថា ជាកូនស្រីរបស់ឆ្មាំគុក ដោយសារនាងឧស្សាហ៍ចេញចូល សួរសុខទុក្ខ និងគាំទ្រគាត់។ មុនពេល គេនាំគាត់ទៅប្រហារជីវិតនៅថ្ងៃទី១៤ កុម្ភៈ លោក Valentine បានសរសេរសំបុត្រយ៉ាងខ្លីមួយផ្ញើរទៅនាងដើម្បីបញ្ជាក់ពីមិត្តភាព និងភាពស្មោះត្រង់របស់គាត់ចំពោះនាងដោយមានចុះហត្ថលេខាថា «ពី Valentine របស់អ្នក» ។ ចាប់ពីពេលនោះមកគឺនៅថ្ងៃទី១៤ ខែកុម្ភៈ គឺតែងតែមានការទិញកាដូជូនគ្នា ទិញផ្កាកុលាប និងមានស្ករគ្រាប់ផងដែរ ដើម្បីបញ្ជាក់ពីក្ដីស្រឡាញ់ គោរព រាប់អានដល់លោក Valentine ដោយកំណត់ឈ្មោះថាជាថ្ងៃ Valentine day ។
ក្រសួងអប់រំ យុវជន និង កីឡា កាលពីថ្ងៃទី០៧ ខែកុម្ភៈ ឆ្នាំ២០២៣នេះ បានចេញសេចក្តីណែនាំដោយផ្ដោតសំខាន់លើចំណុចមួយចំនួនដូចជា ផ្សព្វផ្សាយដល់សិស្សគ្រប់មធ្យោបាយឱ្យបានយល់ដឹងអំពីអត្ថន័យទិវានៃក្តីស្រឡាញ់ ពង្រឹងវិន័យឱ្យបានម៉ឺងម៉ាត់លើការអប់រំសីលធម៌ ដោយតាមដានអវត្តមានរបស់សិស្សានុសិស្សជាប្រចាំ ជំរុញដំណើរការរបស់ក្រុមប្រឹក្សាយុវជន ក្រុមប្រឹក្សាកុមារប្រចាំសាលា ដោយអនុវត្តសកម្មភាព មិត្តអប់រំមិត្ត ទំនាក់ទំនងជិតស្និទ្ធជាមួយមាតាបីតាសិស្ស និងសហគមន៍ដើម្បីទទួលព័ត៌មាននានាដែលពាក់ព័ន្ធនឹងសកម្មភាពមិនប្រក្រតី ដែលប្រព្រឹត្តិដោយសិស្សានុសិស្ស ក្នុងឱកាសទិវានៃក្តីស្រឡាញ់នេះ៕