ប្រភពរូបភាព៖ NBC News & WFP
ក្នុងរយៈពេលប៉ុន្មានឆ្នាំចុងក្រោយ ប្រទេសកូរ៉េខាងជើង បានទទួលរងនូវកង្វះខាតស្បៀងអាហារយ៉ាងធ្ងន់ធ្ងរ ក្រោយជួបប្រទះគ្រោះទឹកជំនន់ ព្យុះទីហ្វុង ការដាក់ទណ្ឌកម្មអន្តរជាតិដែលមានគោលបំណងទប់ស្កាត់កម្មវិធីនុយក្លេអ៊ែរ ក៏ដូចជាការកាត់បន្ថយពាណិជ្ជកម្មជាមួយប្រទេសចិន ដោយសារតែការបិទព្រំដែនទាក់ទងនឹងជំងឺរាតត្បាត។
ទោះជាយ៉ាងណា នៅក្នុងសេចក្តីអត្ថាធិប្បាយមួយ កាសែត Rodong Sinmun របស់គណបក្សកាន់អំណាច បានព្រមានប្រឆាំងនឹងការទទួលជំនួយសេដ្ឋកិច្ចពី «របបចក្រពត្តិនិយម» ដោយអះអាងថា ជំនួយទាំងនោះ នឹងគ្រាន់តែជាអន្ទាក់ដើម្បីប្លន់ និងបង្ក្រាបប្រទេសដែលទទួល និងជ្រៀតជ្រែកក្នុងនយោបាយផ្ទៃក្នុងរបស់ពួកគេប៉ុណ្ណោះ។
សេចក្តីអត្ថាធិប្បាយដដែល បានសង្កត់ធ្ងន់យ៉ាងដូច្នេះ «វាគឺជាកំហុសមួយក្នុងការព្យាយាមជំរុញសេដ្ឋកិច្ចដោយការទទួលយក និងទទួលទានស្ករគ្រាប់ពុលទាំងនេះ»។
យោងតាមសារព័ត៌មាន CNA អត្ថបទនេះ ត្រូវបានចេញផ្សាយខណៈពេលទីភ្នាក់ងារសារព័ត៌មានយ៉ុនហាប់របស់កូរ៉េខាងត្បូងបានរាយការណ៍ពីអ្នកទោសប្រហែល៧០០នាក់នៅពន្ធនាគារជនបទចំនួន៣ រួមទាំងនៅក្រុង Kaechon បានស្លាប់ដោយសារទុរ្ភិក្ស និងជំងឺ ក្នុងរយៈពេល២ឆ្នាំកន្លងមក។
យ៉ាងណាមិញ ក្រសួងបង្រួបបង្រួមរបស់ក្រុងសេអ៊ូលដែលគ្រប់គ្រងកិច្ចការអន្តរកូរ៉េ បានបដិសេធមិនធ្វើអត្ថាធិប្បាយលើរបាយការណ៍នេះទេ ប៉ុន្តែបាននិយាយកាលពីថ្ងៃអង្គារថា មានការកើនឡើងថ្មីៗនៃការស្លាប់ដោយសារភាពអត់ឃ្លាននៅក្នុងខេត្តមួយចំនួនរបស់កូរ៉េខាងជើង។
មន្ត្រីក្រសួងបានប្រាប់អ្នកយកព័ត៌មានយ៉ាងដូច្នេះ «ផលិតកម្មស្បៀងបានធ្លាក់ចុះធៀបនឹងឆ្នាំមុន ហើយមានលទ្ធភាពនៃបញ្ហាចែកចាយ ដោយសារការផ្លាស់ប្តូរគោលនយោបាយផ្គត់ផ្គង់ និងចែកចាយអាហាររបស់ពួកគេ»។
គួរជម្រាបថា ទីភ្នាក់ងារអភិវឌ្ឍន៍ជនបទរបស់កូរ៉េខាងត្បូង កាលពីខែធ្នូ បានប៉ាន់ប្រមាណថា ផលិតកម្មដំណាំរបស់កូរ៉េខាងជើងមានប្រហែល៤,៥នតោនកាលពីឆ្នាំមុន ដោយធ្លាក់ចុះ៣,៨ភាគរយពីឆ្នាំ២០២១ ដែលបណ្តាលមកពីភ្លៀងធ្លាក់ខ្លាំងនៅរដូវក្តៅ និងលក្ខខណ្ឌអាកាសធាតុផ្សេងទៀត៕