​ក្នុង​ពិធី​ចុះ​អនុស្សារ​ណៈ​រវាង​មូលនិធិ​ ​ម៉េង​លី​ ជេ. គួ​ច​ ​ជាមួយ​ពុទ្ធិក​សកលវិទ្យាល័យ​សី​ហ​នុ​រាជ​ ​អ្នកឧកញ៉ា​ ​វេជ្ជបណ្ឌិត​ គួ​ច​ ​ម៉េង​លី​ ​ស្ថាបនិក​ ​ប្រធាន​ក្រុមប្រឹក្សា​ភិ​បាល​ ​និង​អគ្គនាយក​ប្រតិបត្តិ​នៃ​ក្រុមហ៊ុន​ ​ម៉េង​លី​ ជេ. គួ​ច​ អេឌ្យូខេ​សិន​ ​មានប្រសាសន៍ថា​ ​នៅ​កម្ពុជា​មាន​មនុស្ស​វ័យ​ចំណាស់​ជាច្រើន​នាក់​ ​ក្នុង​នោះ​នារី​ក៏មាន​ចំនួន​ច្រើនជាង​បុរស​ ​ដែល​នារី​ទាំងអស់​នោះ​គឺ​ភាគច្រើន​បាន​ឆ្លងកាត់​របប​ខ្មែរក្រហម​។​
​លោក​បន្ត​ថា​ ​បន្ទាប់ពី​របប​ខ្មែរក្រហម​បាន​ដួល​រលំ​ ​គឺ​បុ​រ​សត្រូវ​បាន​សម្លាប់​ភាគច្រើន​ដែល​ធ្វើ​ឱ្យ​នារី​ត្រូវ​មាន​តួនាទី​២​ ​គឺជា​ម្ដាយ​ផង​ ​ជា​ឪពុក​ផង​ ​ក្នុង​ការ​ចិញ្ចឹម​កូនចៅ​និង​ធ្វើការ​ដើម្បី​អភិវឌ្ឍន៍សង្គម​។​ ​លោក​បន្ថែម​ថា​ ​«​តា​តា​ ​ស្លាប់​ស្ទើរ​អស់ហើយ​ពី​ជំនាន់​ហ្នឹង​នោះ​ (​ជំនាន់​ខ្មែរក្រហម​) ​សល់​ច្រើនតែ​នារី​ៗ​ទេ​ ​ធ្វើ​ម្ដាយ​ផង​ ​ធ្វើ​ឪពុក​ផង​ ​ធ្វើមេ​ទ័ព​ផង​ ​ធ្វើ​គ្រប់មុខ​ ​ច្បាំង​ផង​ ​ហើយ​ ​ពេល​ចាស់ជរា​ ​នៅ​ម្នាក់ឯង​គឺ​ពិតជា​ពិបាក​ណាស់​ ​គាត់​គឺជា​វីរនារី​នៅ​ជំនាន់​៧​៩​ ​ដែល​ចេញពី​ខ្មែរក្រហម​មក​ ​គ្មាន​នរណា​កសាង​ជាតិ​ដោយ​គ្មាន​ពួកគាត់​នោះ​ទេ​»​។​
​ករណី​នេះ​ ​អ្នកនាំពាក្យ​ក្រសួងសង្គមកិច្ច​ ​អតីត​យុទ្ធជន​និង​យុ​វ​នីតិសម្បទា​ ​គឺ​លោក​ ​តូច​ ​ចាន់នី​ ​មានប្រសាសន៍ថា​ ​បច្ចុប្បន្ន​ ​មនុស្សចាស់​មិនថា​ស្ត្រី​ឬ​បុរស​នោះ​ទេ​ ​ត្រូវ​បាន​រាជរដ្ឋាភិបាល​យកចិត្តទុកដាក់​ដោយ​ក្រសួងសង្គមកិច្ច​កំពុង​រៀបចំផែនការ​យុទ្ធសាស្ត្រ​សម្រាប់​មនុស្សចាស់​វ័យ​ចាប់ពី​៦​០​ឆ្នាំ​ឡើង​ទៅ​ ​ដោយ​ក្នុង​នោះ​មាន​ជំនួយ​ពី​កម្មវិធី​ជំនួយ​សង្គម​និង​កាកបាទក្រហម​ជាដើម​។​ ​លោក​បន្ត​ថា​ ​បច្ចុប្បន្ន​មនុស្ស​វ័យចាស់​នេះ​គឺ​មាន​ប្រមាណ​៨​,​៩​%​នៃ​ប្រជាពលរដ្ឋ​ប្រជាពលរដ្ឋ​ខ្មែរ​ទាំងអស់​ ​។​
​បើ​តាម​អ្នក​ឧ​ញ៉ា គួ​ច​ ​ម៉េង​លី​ ​មូលនិធិ​ ​ម៉េង​លី​ ជេ. គួ​ច​ ​ក៏បាន​ផ្ដល់​ប្រាក់ឧបត្ថម្ភ​ប្រចាំខែ​ដល់​ស្ត្រី​ជាច្រើន​រូប​ផង​ដែរ​ ​ដើម្បី​តបស្នង​នូវ​អ្វី​ដែល​គាត់​បាន​ធ្វើ​ដើម្បី​ជាតិ​ ​មាតុភូមិ​៕​
​អត្ថបទ៖ រតនៈ