អ្នកជំនាញទីផ្សារមូលបត្រអះអាងថា ជំនួញក្នុងវិស័យនេះនឹងដូចជាវិស័យអចលនទ្រព្យផងដែរ
Admin
.jpg)
លោកស្រី គឹម សុផានីតា ប្រធាននាយកដ្ឋានប្រតិបត្តិការទីផ្សារ នៃផ្សារមូលបត្រកម្ពុជា បានថ្លែងថា ប្រជាពលរដ្ឋខ្មែរគឺពិតជាមានបទពិសោធន៍ច្រើននិងទទួលបានផលប្រយោជន៍លើវិស័យអចលនទ្រព្យព្រោះថា ប្រទេសមានសុខសន្តិភាព ប៉ុន្តែនៅពេលនេះកម្ពុជាមានវិស័យថ្មីមួយទៀតដែលបានចូលមកគឺវិស័យមូលបត្រ។ អ្នកស្រីបន្តថា វិស័យមូលបត្រត្បិតតែកើតឡើង១០ឆ្នាំមកហើយ ប៉ុន្តែវិស័យនេះ នឹងក្លាយជាវិស័យថ្មីមួយដែលអាចឱ្យប្រជាពលរដ្ឋស្វែងរកប្រាក់ចំណេញមិនចាញ់វិស័យអចលនទ្រព្យនោះទេ ព្រោះនៅប្រទេសជាច្រើនលើពិភពលោក គឺអ្នកមាន ឬសេដ្ឋីជាច្រើនជោគជ័យគឺដោយសារតែវិស័យមូលបត្រនេះ។
លោកស្រី គឹម សុផានីតា បន្តថា នៅពេលក្រុមហ៊ុនដែលវិនិយោគនៅកម្ពុជាកាន់តែរីកចម្រើន គឺត្រូវតែដើរទន្ទឹមគ្នាជាមួយវិស័យមូលបត្រនេះ ព្រោះថា នៅពេលដែលអ្នកវិនិយោគបោះទុនលើវិស័យមូលបត្រទៅក្រុមហ៊ុនណាមួយ ប្រាក់ចំណេញនឹងវិលមករកអ្នកបោះទុនទាំងនោះវិញ តាមរយៈវិស័យមូលបត្រនេះ។
លោកស្រីបញ្ជាក់ថា វិស័យអចលនទ្រព្យចាប់ផ្ដើមសកម្មភាពច្រើននៅក្នុងកំឡុងឆ្នាំ២០០០ ហើយតម្លៃនៅទាបមិនសូវមានអ្នកចាប់អារម្មណ៍ ប៉ុន្តែនៅពេលដែលមានកំណើនតម្លៃដីធ្លីក៏កើតឡើងដូចគ្នា ដូចនេះ វិស័យមូលបត្រក៏ដូចគ្នានៅពេលចាប់ផ្ដើមតម្លៃគឺនៅទាប ប៉ុន្តែនៅពេលដែលមានកំណើនតម្លៃក៏ឡើងខ្ពស់ដូចគ្នា ។
បើតាមអ្នកស្រី គឹម សុផានីតា នៅចុងឆ្នាំ២០២២ និងដើមឆ្នាំ២០២៣នេះ អ្នកដែលបានបង្កើតគណនីដើម្បីជួញដូរលើវិស័យមូលបត្រគឺហាក់ឡើងខ្ពស់ជាងពេលមុនៗ ខណៈដែលវិស័យមួយនេះបានដំណើរការរយៈពេល១០ឆ្នាំមកហើយ៕
