លោក ពូទីន រៀបចំសុន្ទរកថាសំខាន់ ក្រោយទស្សនកិច្ចរបស់លោក បៃដិន នៅអ៊ុយក្រែន
Admin
នៅក្នុងសុន្ទរកថាទៅកាន់សមាជិកសភានៅថ្ងៃអង្គារនេះ លោក ពូទីន នឹងធ្វើបច្ចុប្បន្នភាពឥស្សរជននយោបាយ និងយោធារបស់រុស្ស៊ីលើជម្លោះអ៊ុយក្រែន ដែលជាការប្រឈមមុខគ្នាដ៏ធំបំផុតជាមួយលោកខាងលិចចាប់តាំងពីសង្គ្រាមត្រជាក់ ។
ប្រភពរូបភាព៖ The Straits Times
វិមានក្រឹមឡាំង បានឱ្យដឹងថា ប្រធានាធិបតីរបស់ខ្លួនក៏នឹងផ្តល់ការវិភាគអំពីស្ថានភាពអន្តរជាតិ ក៏ដូចជាគូសបញ្ជាក់អំពីចក្ខុវិស័យរបស់លោកចំពោះការអភិវឌ្ឍរបស់រុស្ស៊ី បន្ទាប់ពីលោកខាងលិចបានដាក់ទណ្ឌកម្មយ៉ាងធ្ងន់ធ្ងរផងដែរ។
បើតាមការចេញផ្សាយពីសារព័ត៌មាន CNA សុន្ទរកថាដ៏សំខាន់នេះ នឹងចាប់ផ្តើមនៅរសៀលម៉ោង៤ ថ្ងៃអង្គារ ទី២១ (ម៉ោងនៅកម្ពុជា) នៅកណ្តាលក្រុងម៉ូស្គូ ដោយកិច្ចប្រជុំត្រូវបានរៀបចំក្រោយដំណើរទស្សនកិច្ចដ៏គួរឱ្យភ្ញាក់ផ្អើលទៅកាន់ប្រទេសអ៊ុយក្រែនរបស់លោក ចូ បៃដិន ដែលបានសន្យាថា នឹងផ្តល់ជំនួយបន្ថែមទៀតទៅកាន់ក្រុងគៀវ រួមទាំងការប្តេជ្ញាគាំទ្រមិនរាថយ។
នៅកំលុងពេលនៃទស្សនកច្ចិ លោក បៃដិន បានលើកឡើងយ៉ាងដូច្នេះ «ពេលលោក ពូទីន ចាប់ផ្តើមការលុកលុយរបស់ខ្លួនកាលពីជិតមួយឆ្នាំមុន គាត់គិតថាអ៊ុយក្រែនខ្សោយ ហើយលោកខាងលិចត្រូវបានបែងចែក។ គាត់គិតថា អាចយកឈ្នះលើពួកយើងបាន។ ប៉ុន្តែគាត់គិតខុសស្រឡះ»។
ជាក់ស្តែង ចាប់តាំងពីប្រទេសអ៊ុយក្រែនបានផុងក្នុងជម្លោះជាមួយរុស្ស៊ីមក សហរដ្ឋអាមេរិក បានព្យាយាមផ្គត់ផ្គង់ប្រទេសនេះជាមួយនឹងកញ្ចប់ជំនួយរាប់រយលានដុល្លារ ហើយនៅក្នុងដំណើរទស្សនកិច្ចដ៏សម្ងាត់ ក្រសួងការបរទេសអាមេរិក ក៏បានប្រកាសផ្តល់ជំនួយចំនួន៥០០លានដុល្លារបន្ថែមទៀតដែរ ដើម្បីទប់ទល់នឹងសង្គ្រាម។
ជាការសាទរ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី (Volodymyr Zelenskyy) បាននិយាយថា «ដំណើរទស្សនកិច្ចរបស់ប្រធានាធិបតីអាមេរិកមកកាន់អ៊ុយក្រែនជាលើកដំបូងសម្រាប់រយៈពេល១៥ឆ្នាំនេះ គឺជាដំណើរទស្សនកិច្ចដ៏សំខាន់បំផុតក្នុងប្រវត្តិសាស្រ្តនៃទំនាក់ទំនងអ៊ុយក្រែននិងសហរដ្ឋអាមេរិក»។
បើតាមការឱ្យដឹងពីមន្ត្រីក្រុងវ៉ាស៊ីនតោន និងក្រុងម៉ូស្គូ ប្រទេសរុស្ស៊ី ត្រូវបានជូនដំណឹងរួចទៅហើយមុនការចាកចេញរបស់លោក ចូ បៃដិន ដើម្បីជៀសវាងហានិភ័យនៃការវាយប្រហារលើក្រុងគៀវ កំលុងពេលលោកនៅទីនោះ។
ជុំវិញករណីនេះ អ្នកវិភាគនយោបាយរុស្ស៊ី លោកស្រី Tatiana Stanovaya បាននិយាយថា «ជាការពិតណាស់សម្រាប់វិមានក្រឹមឡាំង សកម្មភាពនេះ នឹងត្រូវបានមើលឃើញថា ជាភស្តុតាងបន្ថែមទៀតដែលថាសហរដ្ឋអាមេរិកបានភ្នាល់លើការបរាជ័យជាយុទ្ធសាស្រ្តរបស់រុស្ស៊ីនៅក្នុងសង្រ្គាម ហើយថាសង្រ្គាមបានប្រែក្លាយទៅជាសង្រ្គាមរវាងរុស្ស៊ី និងលោកខាងលិច»៕
