​ក្រុម​ការងារ​ទប់​ស្កាត់​ហា​និ​ភ័យ​របស់​នាយកដ្ឋាន​គ្រប់គ្រង​ទឹក​ ​ព្រៃឈើ​ ​និង​ហេដ្ឋារចនាសម្ពន្ធ​ ​នៃ​អាជ្ញាធរ​ជាតិ​អប្សរា​ ​បាន​សិក្សា​ផែនទី​ហា​និ​ភ័យ​ ​ដើម្បី​កំណត់​ឱ្យ​ដឹង​ថា​ទីតាំង​ដែល​ចាំបាច់​អន្តរាគមន៍​ភ្លាម​ៗ​ ​ទប់​ស្កាត់​រាល់​បញ្ហា​ណាមួយ​ដែល​អាច​កើតមានឡើង​ដោយ​យថាហេតុ​។​ ​ក្នុង​ការងារ​ទល់​ទ្រ​ជាបន្ទាន់​មួយ​នៅ​ថែវ​ ​នៅ​រួត​ទី​១​ផ្នែក​ខាងត្បូង​នៃ​ប្រាសាទអង្គរវត្ត​ ​ប្រវែង​១​០​០​ម៉ែត្រ​ ​និង​ទទឹង​៥​ម៉ែត្រ​ ​ក​ម្ពស់​៧​ម៉ែត្រ​ ​ជា​ទីតាំង​ដំបូង​នៅ​ក្នុង​ផែនទី​ហា​និ​ភ័យ​ ​ដើម្បី​ធានា​ដល់​រចនា​ស​ម្ព័ន្ធ​មួយ​ចំនួន​កុំ​ឱ្យ​ឈាន​ដល់​ការខូចខាត​។​ ​បន្ទាប់មក​ ​ក្រុម​ការងារ​នឹង​បន្ត​បំ​ពេញការ​ងារ​ជាបន្តបន្ទាប់​ទៅតាម​ទិសដៅ​ដែល​បាន​កំណត់​នៅ​ក្នុង​ផែនទី​ហា​និ​ភ័យ​។​

​លោក​ ​សុខ​ ​សូ​សិលា​ ​អនុប្រធាន​នាយកដ្ឋាន​គ្រប់គ្រង​ទឹក​ ​ព្រៃឈើ​និង​ហេ​ដ្ឋា​រចនា​ស​ម្ព័ន្ធ ​នៃ​អាជ្ញាធរ​ជាតិ​អប្សរា​ ​មានប្រសាសន៍ថា​ ​ក្នុងរយៈពេល​២​ឬ​៣​ស​ប្ដាហ៍​ចុងក្រោយ​នេះ​ ​ភ្លៀង​បាន​ធ្លាក់​ខ្លាំង​ ​ហើយ​ទឹកហូរ​បាចសាច​ចូល​សព្វ​ផ្នែក​ទាំងអស់​នៃ​ថែវ​ ​នៅ​រួត​ទី​១​ផ្នែក​ខាងត្បូង​នៃ​ប្រាសាទអង្គរវត្ត​ ​បណ្ដាល​ឱ្យ​ប៉ះពាល់​គ្រឹះ​ ​បង្ក​ឱ្យ​ផ្នែក​ខ្លះ​នៃ​ថែវ​រំកិល​ ​ជញ្ជាំង​ហើប​ ​និង​ធ្នឹម​ចាប់ផ្ដើម​ញែក​ចេញពី​គ្នា​។​ ​លោក​បន្ត​ថា​ ​ដោយសារតែ​បញ្ហា​នេះ​ ​ក្រុម​ការងារ​ទប់​ស្កាត់​ហា​និ​ភ័យ​ ​ក៏បាន​យក​ឈើ​ ​និង​រន្ទា​ដែក​មួយ​ចំនួន​ធ្វើការ​ទល់​ទ្រ​ជាបន្ទាន់​ដើម្បី​ជួយសង្គ្រោះ​ជា​បណ្ដោះអាសន្ន​ ​នៅមុន​ពេល​ដែល​ឈាន​ទៅដល់​ការ​សុំ​អនុសាសន៍​ពី​គណៈកម្មាធិការ​ ​អាយ​ ​ស៊ី​ ​ស៊ី​ ​អង្គរ​ ​ថា​តើ​ត្រូវធ្វើ​យ៉ាងណា​បន្ត​ទៀត​នោះ​។​

​សូម​បញ្ជាក់​ថា​ ​ការ​ទល់​ទ្រ​មួយ​ផ្នែក​នៃ​ថែវ​ ​នៅ​រួត​ទី​១​ភាគ​ខាងត្បូង​ ​របស់​ប្រាសាទអង្គរវត្ត​ប្រវែង​១​០​០​ម៉ែត្រ​ ​និង​ទទឹង​៥​ម៉ែត្រ​នេះ​ ​គឺជា​គម្រោង​បន្ទាន់​ដំបូង​គេ​ ​ដែល​ក្រុម​ការងារ​បាន​អនុវត្ត​។​ ​នៅ​ពេល​ខាងមុខ​ ​ក្រុម​ការងារ​ទប់​ស្កាត់​ហា​និ​ភ័យ​ ​មាន​គម្រោង​នឹង​ធ្វើការងារ​ពង្រឹង​ធ្នឹម​ ​សសរ​ ​និង​ដំបូល​នៃ​ថែវ​របស់​ប្រាសាទអង្គរវត្ត​ ​ចំនួន​៣​៨​ទីតាំង​បន្ថែម​ទៀត​៕​

​ប្រភព៖ អាជ្ញាធរ​ជាតិ​អប្សរា​