មូលនិធិ ម៉េងលី ជេ. គួច បានកែប្រែជីវិតក្មេងស្រុកទន្លេម្នាក់ឱ្យមានការងារសមរម្យ
Admin
អឿ ស៊ីណា គឺជាកូនអ្នកស្រុកជលគិរី ខេត្តកំពង់ឆ្នាំង មួយរូបដែលទទួលបានអាហារូបករណ៍សិក្សាថ្នាក់បរិញ្ញាបត្រជាន់ខ្ពស់លើមុខវិជ្ជាអក្សរសាស្ត្រខ្មែរ ។ « ខ្ញុំទទួលបានដំណឹងថា អ្នកឧកញ៉ា វេជ្ជបណ្ឌិត គួច ម៉េងលី គាត់បានផ្ដល់អាហារូបករណ៍ថ្នាក់បរិញ្ញាបត្រជាន់ខ្ពស់ជំនាញអក្សរសាស្ត្រខ្មែរអារម្មណ៍ពេលហ្នឹងគឺពិតជារំភើប ត្រេកអរ រកអ្វីប្រៀបផ្ទឹមពុំបាននោះទេ ព្រោះខ្ញុំស្រឡាញ់វិស័យអក្សរសាស្ត្រខ្មែរ ហើយយើងជាកូនអ្នកក្រម្នាក់ដែលការសិក្សាថ្នាក់អាហារូបករណ៍របស់ធនាគារពិភពលោកសហការជាមួយរដ្ឋាភិបាល»។ នេះជាការម្លឹករបស់លោក អឿ ស៊ីណា ខណៈដែលលោកកំពុងអង្គុយនិយាយគ្នាលេងបន្ទាប់ពីហូបបាយថ្ងៃត្រង់រួច មុនចូលបំពេញកាងារបន្ត។
ចាប់កំណើតនៅក្នុងគ្រួសារកសិករ និងអ្នកនេសាទត្រី នៅភូមិកោះធំ ឃុំព្រៃគី ស្រុកជលគិរី ខេត្ដកំពង់ឆ្នាំង លោក អឿ ស៊ីណា ដែលជាកូនច្បងក្នុងចំណោមបងប្អូន៦នាក់បានរៀបរាប់ថា «នៅតំបន់នោះ(ស្រុកកំណើតរបស់លោក អឿ ស៊ីណា ) គឺជាតំបន់មួយដែលជំនាន់ខ្ញុំគេមិនសូវឱ្យតម្លៃទៅលើការរៀនសូត្រប៉ុន្មានទេ ជាតំបន់ដែលគេឱ្យតម្លៃទៅលើការរកស៊ី ទៅលើការនេសាទត្រី ឬក៏ការធ្វើស្រែចម្ការបន្តិចបន្តួច ព្រោះជាតំបន់ដាច់ស្រយាល ។» លោកបន្តថា បើទោះជាគេមិនសូវឱ្យតម្លៃទៅលើការសិក្សាក្តី ប៉ុន្តែដោយមានឈាមជ័រជាអ្នកសិក្សា រៀនសូត្របានច្រើន លោកក៏តស៊ូក្នុងការសិក្សាបើទោះជាពេលខ្លះខកខានមិនបានទៅ ដោយសារត្រូវទៅជួយឪពុកម្ដាយដើម្បីរកប្រាក់ចិញ្ចឹមគ្រួសារក្តី។ លោកស៊ីណារម្លឹកថា «ខ្ញុំត្រឹមតែថ្នាក់ទី៤ ទី៥ហ្នឹងខ្ញុំទៅធ្វើការច្រូតស្រូវឱ្យគេបាត់ទៅហើយ កាលពីជំនាន់ហ្នឹងបានតែ៣០០០ទៅ៤០០០រៀលអីទេ ច្រូតមួយថ្ងៃទល់ល្ងាច ។ អ៊ីចឹងឧបមាថា យើងទៅរៀនពេលព្រឹក យើងអាចទៅធ្វើការខ្លួនឯងអីចឹងទៅ ឧបមាថាថ្ងៃសៅរ៍ អាទិត្យយើងទៅច្រូតស្រូវឱ្យគេ ឬក៏ស្ទូងស្រូវឱ្យគេអីចឹងទៅ តាមរដូវកាលអីចឹងទៅ»។
យ៉ាងនេះក្តី យុវជន អឿ ស៊ីណា បានតស៊ូរៀនសូត្ររហូតដល់ចប់ថ្នាក់មធ្យមសិក្សាទុតិយភូមិ (បាក់ឌុប) ព្រមទាំងទទួលបានអាហារូបករណ៍មកសិក្សាបន្តថា្នក់បរិញ្ញាបត្រនៅរាជធានីភ្នំពេញ។ លោកស៊ីណាបន្ថែមថា «ម្ដាយខ្ញុំគាត់ថា បើសិនជាទៅមុខមិនរួចទេឈប់ទៅ ពេលហ្នឹងខ្ញុំដូចជាថ្នាក់ទី១១ ខ្ញុំពិបាកចិត្តមែនទែនពេលដែលខ្ញុំឈប់រៀន ខ្ញុំមិនមាត់មិនករ បាយទឹកក៏មិនឃ្លាន អារម្មណ៍ហាក់ក្ដុកក្កួលនៅពេលដែលយើងអត់បានទៅរៀន។ ឪពុកម្ដាយខ្ញុំគាត់ក៏មិនបានថា ឱ្យទៅរៀនឬមិនទៅរៀនទេ ប៉ុន្តែខ្ញុំមិនដឹងជានឹកយ៉ាងម៉េចខ្ញុំទៅរៀនវិញ ទៅរៀនវិញរហូតដល់ចប់ទី១២ទៅ។ ដល់ពេលដែលចប់ទី១២ហ្នឹង គឺសំណាងល្អដែលខ្ញុំទទួលបានអាហារូបករណ៍អទិភាពពិសេសរបស់ធនាគារ(WORLD BANK) សហការជាមួយរដ្ឋាភិបាល អាហារូបករណ៍ហ្នឹងគឺគេឱ្យចំពោះសិស្សដែលក្រីក្រពិតប្រាកដ គេចុះទៅដល់ជាក់ស្ដែង គេឃើញខ្ញុំពិតជាក្រីក្រ ហើយគួបផ្សំជាមួយការប្រឡងរបស់ខ្ញុំដាក់ជាប់និទ្ទេសដែលខ្ញុំស្រឡាញ់ហ្នឹងទទួលបាននិទ្ទេសល្អទៀត ធ្វើឱ្យម្ចាស់ធនាគារ និងរដ្ឋាភិបាលគេឱ្យអាហារូបករណ៍ហ្នឹងមកខ្ញុំ»។.png)
ជីវិតបន្តការសិក្សានៅរាជធានីភ្នំពេញ
បើទោះជាបានជោគជ័យក្នុងការប្រឡងជាប់ថ្នាក់មធ្យមសិក្សាទុតិយភូមិ និងបានអាហាររូបករណ៍បន្តការសិក្សាថ្នាក់ឧត្តមក្តី ប៉ុន្តែជីវិតយុវសិស្ស អឿ ស៊ីណា មិនទាន់បញ្ចប់ការលំបាកនៅឡើយទេ ព្រោះត្រូវរស់ដោយខ្លួនមួយក្នុងជីវិតជានិសិត្សនៅរាជធានីភ្នំពេញ។ លោក អឿ ស៊ីណា រៀបរាប់ថា «ក្រោយមកទៀតគឺយើងជួបឧបសគ្គមួយមួយទៀតគឺអត់មានលុយធ្វើដំណើរមកសិក្សានៅទីក្រុងភ្នំពេញ។ ម្ដាយខ្ញុំគាត់បានលក់ ចិញ្ចៀន និងខ្សែក ដើម្បីជាសោហ៊ុយក្នុងការធ្វើដំណើរមកភ្នំពេញ ក៏ដូចជាហូបចុកនៅក្នុងទីក្រុងភ្នំពេញហ្នឹង។ ពេលមកដល់ទីក្រុងភ្នំពេញ អ្វីដែលពិបាកបំផុតគឺខ្ញុំគ្មានផ្ទះស្នាក់នៅ គ្មានបន្ទប់ស្នាក់នៅ ទៅស្នាក់នៅបន្ទប់មិត្តភក្តិបានប៉ុន្មានថ្ងៃ ហើយមួយទៀតអត់ស្គាល់សាលាភូមិន្ទភ្នំពេញហ្នឹងយ៉ាងម៉េចទៀត ឱ្យមិត្តភក្តិជូនមក»។.png)
សិក្សាបណ្ដើរធ្វើការបណ្ដើររហូតទទួលបានអាហារូបករណ៍បន្តថ្នាក់បរិញ្ញាបត្រជាន់ខ្ពស់
ក្រោយពីទទួលបានអាហាររូបករណ៍ថ្នាក់បរិញ្ញាបត្រហើយនោះ យុវសិស្ស អឿ ស៊ីណា ខិតខំរៀនសូត្រផង និងធ្វើការផងដើម្បីផ្គត់ផ្គង់ជីវភាពជានិសិត្សនៅរាជធានីភ្នំពេញ ការតស៊ូ ទំនាក់ទំនងល្អបានធ្វើឱ្យទទួលការងារថ្មីនៅក្រុមហ៊ុន ម៉េងលី ជេ. គួច អេឌ្យូខេសិន ជាទីដែលលោក ទទួលបានអាហារូបករណ៍បន្តថ្នាក់បរិញ្ញាបត្រជាន់ខ្ពស់។ លោក ស៊ីណា ប្រាប់ថា «២០១៣-២០១៤ ខ្ញុំទៅធ្វើការស្ម័គ្រចិត្តជាអ្នកសរសេរព័ត៌មានឱ្យខាងទូរទស្សន៍មួយ កាលហ្នឹងបានប្រាក់ខែតិចតួចទេ ដូចជា១០០(ដុល្លារសហរដ្ឋអាមេរិក)ជាង។ យើងស្ម័គ្រចិត្តទៅយើងរៀនពេលព្រឹក យើងធ្វើការពេលថ្ងៃទៅ បើរៀនពេលថ្ងៃយើងធ្វើការពេលព្រឹកទៅ។ ធ្វើការស្ម័គ្រចិត្តរយៈពេលបានចប់បរិញ្ញាបត្រ ខ្ញុំក៏បានមានឱកាសដាក់CV មកក្រុមហ៊ុន ម៉េងលី ជេ. គួច អេឌ្យូខេសិន ពេលហ្នឹងដាក់ពាក្យមកមិនសង្ឃឹមថាជាប់នោះទេ ព្រោះយើងជាអ្នកក្រីក្រ ចប់ថ្មីៗមិនទាន់មានបទពិសោធពីរឿងអស់ហ្នឹងទេ ។ ពេលដាក់មក (CV) វាពិតជាភព្វសំណាងមែន (CV) ពេលដាក់មកដល់អ្នកឧកញ៉ា (គួច ម៉េងលី )គាត់បានសម្ភាសផ្ទាល់ ជាមួយលោកគ្រូ អ្នកគ្រួ ដែលគាត់មានជំនាញ។ ពេលហ្នឹងគាត់សួរមកភ្លាមអីចឹងទៅ អ្នកឧកញ៉ាក៏បានពេញចិត្តនូវអ្វីដែលខ្ញុំមាន អីចឹងទៅខ្ញុំសម្ភាសន៍នៅថ្ងៃទី១៣ ខែសីហា ឆ្នាំ២០១៥ គាត់គិតលុយពីថ្ងៃទី១៣ ខែសីហា ឆ្នាំ២០១៥ហ្នឹងតែម្ដង»។
លោក ស៊ីណា បន្ថែមថា «ខ្ញុំធ្វើការប្រហែលជា២ឆ្នាំ ដោយមើលពីសមត្ថភាពរបស់ខ្ញុំ ក៏ដូចជាអត្តចរិករបស់ខ្ញុំថា អាចទទួលយកបាន ហើយក៏ជាមនុស្សមួយអាចទុកចិត្តបាន អ្នកឧកញ៉ាក៏បានផ្ដល់អាហារូបករណ៍ឱ្យខ្ញុំថ្នាក់អនុបណ្ឌិត ឬក៏អាចហៅបានថា ថ្នាក់បរិញ្ញាបត្រជាន់ខ្ពស់ ផ្នែកអក្សរសាស្ត្រខ្មែរ។ រឿងហ្នឹងហើយដែលធ្វើឱ្យខ្ញុំកាន់តែគោរពគាត់ ហើយរំភើបនៅពេលដែលទទួលបានអាហារូបករណ៍ ព្រោះក្តីស្រម៉ៃរបស់ខ្ញុំចង់រៀនអាហារូបករណ៍ហ្នឹងរហូតដល់បណ្ឌិត»។
ក្រោយសិក្សារយៈពេល៣ឆ្នាំ លោកក៏បានបញ្ចប់ថ្នាក់បរិញ្ញាបត្រជាន់ខ្ពស់ ផ្នែកអក្សរសាស្ត្រខ្មែរ។ ក្រោយបញ្ចប់ការសិក្សាថ្នាក់បរិញ្ញាបត្រជាន់ខ្ពស់ លោក អឿ ស៊ីណា និពន្ធសៀវភៅជាបន្តបន្ទាប់ ដើម្បីតបស្នងនូវអ្វីដែលលោកបានរៀនសូត្រ ដែលក្នុងនោះស្នាដៃដែលលោករៀបរៀងមានដូចជា៖ ១. សៀវភៅ គំនិតរកស៊ី គួច ម៉េងលី ២. សៀវភៅ កម្រងកំណាព្យពីដួងចិត្ត។ ក្រៅពីនេះលោកក៏បាននិពន្ធសៀវភៅ ជាបន្តបន្ទាប់ដូចជា៖១. សៀវភៅ កម្រងកំណាព្យ វេជ្ជបណ្ឌិត គួច ម៉េងលី និងខ្ញុំ ២. សៀវភៅកម្រងរឿងខ្លី ឧកញ៉ាវេជ្ជបណ្ឌិត គួច ម៉េងលី និមិត្ដរូបខ្ញុំ (ស្នាដៃនិពន្ធរួមក្រុមការងារ) ៣. សៀវភៅកំណាព្យ បេះដូងពុក៕
