ចិន និងហុងគ្រី ត្រៀមសហការដើម្បីបញ្ចប់ជម្លោះអ៊ុយក្រែន
Admin
ប្រភពរូបភាព៖ South China Morning Post
យោងតាមសារព័ត៌មាន CNA លោក វ៉ាង យី (Wang Yi) ដែលជាអ្នកការទូតកំពូលរបស់ប្រទេសចិន បានលើកឡើងអំពីការត្រៀមខ្លួននេះនៅក្នុងក្រុងប៊ុយដាប៉ែស ប្រទេសហុងគ្រី ចំពេលមានភាពតានតឹងជុំវិញការចោទប្រកាន់របស់សហរដ្ឋអាមេរិកដែលថាក្រុងប៉េកាំងកំពុងពិចារណាផ្តល់អាវុធសាហាវដល់រុស្ស៊ីសម្រាប់សង្គ្រាមនៅអ៊ុយក្រែន។
ការបកប្រែផ្លូវការមួយ លោក វ៉ាង យី បានលើកឡើងយ៉ាងដូច្នេះ «ប្រទេសចិន និងហុងគ្រីរីករាយក្នុងការធ្វើការរួមគ្នាជាមួយប្រទេសដែលស្រឡាញ់សន្តិភាពផ្សេងទៀតដើម្បីបញ្ចប់សង្រ្គាមបច្ចុប្បន្នឱ្យបានឆាប់តាមដែលអាចធ្វើទៅបាន»ហើយ «ពួកយើងចង់ឱ្យភាគីនានាត្រឡប់ទៅតុចរចាវិញ» ដោយលោកបានរំម្លឹកឡើងវិញពីការអំពាវនាវឱ្យមានការគាំទ្រចំពោះសំណើរបស់ចិនដើម្បីបញ្ចប់សង្រ្គាម។
ជាការឆ្លើយតបវិជ្ជមាន រដ្ឋមន្ត្រីការបរទេសហុងគ្រី លោក Peter Szijjarto បាននិយាយថា លោកពិតជាស្វាគមន៍ចំពោះគោលជំហររបស់ចិន ដែលព្យាយាមបង្កើតសន្តិភាព។
ទន្ទឹមនឹងនោះ លោក វ៉ាង ក៏បានសាទរចំពោះ «គោលនយោបាយមិត្តភាពចិន» របស់រដ្ឋាភិបាលហុងគ្រីផងដែរ ដោយថ្លែងអំណរគុណដល់ក្រុងប៊ុយដាប៉ែស សម្រាប់ការគាំទ្រមុខតំណែងស្របច្បាប់របស់ចិននៅក្នុងវេទិកាអន្តរជាតិ និងពហុភាគី។
លោក វ៉ាង បានបន្ថែមថា ទោះបីជាប្រទេសចិន និងហុងគ្រីមានភូមិសាស្ត្រឆ្ងាយពីគ្នាក៏ដោយ ប៉ុន្តែទំនាក់ទំនងរបស់ពួកគេកំពុងអភិវឌ្ឍន៍យ៉ាងខ្លាំង។
គួរបញ្ជាក់ថា អ្នកការទូតកំពូលរបស់ក្រុងប៉េកាំង ដែលបានទៅទស្សនារដ្ឋធានីអឺរ៉ុបជាច្រើនក្នុងប៉ុន្មានថ្ងៃថ្មីៗ និងបានចូលរួមសន្និសីទសន្តិសុខក្រុង Munich នឹងធ្វើដំណើរទៅកាន់ក្រុងមូស្គូ ប្រទេសរុស្ស៊ី សម្រាប់ដំណើរទស្សនកិច្ចបន្ទាប់របស់លោក៕
