កម្ពុជា-តួកគី ឯកភាពកិច្ចសហប្រតិបត្តិការរួមគ្នាក្នុងវិស័យកសិកម្ម
Admin
រូបភាព៖ ហ្វេសប៊ុក លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ
លោក ឌិត ទីណា លើកឡើងបែបនេះលើបណ្តាញសង្គមហ្វេសប៊ុកនៅថ្ងៃទី១២ ខែមករា ឆ្នាំ២០២៣ ម្សិលមិញនេះ បន្ទាប់ពីលោក ទទួលជួបប្រជុំពិភាក្សាការងារជាមួយលោក វ៉ាហ៊ីត គីរីស៊ី (Vahit KIRISCI) រដ្ឋមន្ត្រីក្រសួងកសិកម្ម និងព្រៃឈើ នៃសាធារណរដ្ឋតួកគី កាលពីថ្ងៃទី១១ ខែមករា នៅទីស្តីការក្រសួងកសិកម្ម។
លោក ឌិត ទីណា បានបញ្ជាក់ថា ប្រទេសកម្ពុជានិងតួកគី មានកិច្ចសហប្រតិបត្តិការរួមគ្នានៅក្នុងវិស័យជាច្រើន ក្នុងនោះ កសិកម្មក៏ជាវិស័យសក្ដានុពលមួយផងដែរ។ ខណៈដែលតួកគីជាប្រទេសឈានមុខមួយនៅក្នុងវិស័យកសិកម្ម។
លោក បាននិយាយថា៖ «យើងបានឯកភាពគ្នាជាគោលការណ៍លើកិច្ចសហប្រតិបត្តិការកម្ពុជានិងតួកគីនៅក្នុងវិស័យកសិកម្ម ដែលមានដូចជា ការផ្ទេរបច្ចេកវិទ្យានិងពាណិជ្ជកម្មគ្រឿងយន្តកសិកម្មគ្រប់ប្រភេទ ពីតួកគី ជាពិសេស ដ្រូន ដែលអាចឃ្លាំមើលព្រៃនិងដែននេសាទ។ ការនាំចូលនូវកសិផលខ្មែរដែលមានតម្លៃបន្ថែមខ្ពស់ទៅកាន់ទីផ្សារតួកគី។ ការផ្ដល់អាហារូបករណ៍ដល់និស្សិតកម្ពុជាទៅសិក្សាផ្នែកកសិកម្មនៅប្រទេសតួកគីជាដើម។»
តាមរយៈកិច្ចប្រជុំទ្វេភាគីនេះលោក ឌិត ទីណា ជឿជាក់ថា កិច្ចសហប្រតិបត្តិការថ្មីនេះ នឹងនាំមកនូវការរីកចម្រើនបន្ថែមទៀតដល់វិស័យកសិកម្មកម្ពុជា៕
