កញ្ញា ស៊ុន កញ្ញារ៉ា៖ គ្រប់ដំណក់ញើសឈាមពុកម៉ែមានតម្លៃណាស់សម្រាប់ការសិក្សាកូនៗ
Admin
ជាកូនអ្នកមានជីវភាពក្រលំបាក់រស់នៅក្នុងភូមិកុមារពេទ្យ ឃុំអូរ ស្រុកភ្នំស្រួច ខេត្តកំពង់ស្ពឺ កញ្ញា ស៊ុន កញ្ញារ៉ា បានប្រាប់ក្រុមការងារ MJQTV ឱ្យដឹងពីដំណើរជីវិតក្នុងការសិក្សារបស់ខ្លួនយ៉ាងដូច្នេះថា « កាលនៅរៀនបឋមសិក្សាសាលានៅជិតផ្ទះដើរតែ១០នាទីគឺដល់សាលាហើយ តែនៅពេលរៀននៅវិទ្យាល័យសាលានៅឆ្ងាយពីផ្ទះគួបផ្សំនឹងជីវភាពខ្វះខាតផង ខ្ញុំក៏បានសុំឪពុកដើម្បីរកការងារធ្វើនៅភ្នំពេញ តែដោយមើលឃើញពីតម្លៃនៃការសិក្សាឪពុករបស់ខ្ញុំមិនព្រមឱ្យខ្ញុំឈប់រៀនឡើយ គឺធ្វើយ៉ាងណាត្រូវរៀនឱ្យចប់ទី១២»។
កញ្ញាបន្តថា បើទោះបីជាឪពុងរបស់ខ្លួនមិនឱ្យឈប់រៀនក៏ពិតមែនតែកញ្ញានៅតែមានកូនចិត្តចង់រកការងារធ្វើដើម្បីរកលុយជួយសម្រួលបន្ទុកគ្រូសារ តែស្ថិតនៅក្នុងស្ថានភាពនេះ កញ្ញាបានតាំងចិត្តថា នឹងបន្តការសិក្សាឱ្យចប់ថ្នាក់ទី១២ ទាំងខ្លួនកំពុងរងនូវការខ្វះខាតដោយមានពេលខ្លះគ្មានទាំងលុយទិញរបស់ញាំផងនោះ។
ទោះចាប់កំណើតក្នុងត្រកូលទីទ័លក្រ លំបាកវេទនា គ្មានទីជម្រកត្រឹមត្រូវ រស់នៅខ្វះមុខ ខ្វះក្រោយក៏ពិតមែន តែគ្រួសារមួយនេះ បានផ្ដល់នូវភាពកក់ក្ដៅ និងក្ដីស្រឡាញ់ឱ្យគ្នាទៅវិញទៅមក ពិសេសក្ដីស្រឡាញ់លោកឪពុកអ្នកម្ដាយចំពោះកូនៗគ្រប់ៗគ្នាក្នុងការទទួលបានការសិក្សារៀនសូត្រ។
កញ្ញា ស៊ុន កញ្ញារ៉ា បានរៀបរាប់បន្ថែមថា «យប់ឡើងគាត់គ្មានទាំងកន្លែងគេងពេលខ្លះគាត់ (ឪពុកកញ្ញា ស៊ុន កញ្ញារ៉ា) គាត់គេងនៅលើស៊ីក្លូ ឬគេងនៅមុខផ្ទះគេជាថ្នូរជួយមើលផ្ទះឱ្យគេនៅពេលរាត្រីដើម្បីបានកន្លែងសម្រាក សកម្មភាពរបស់គាត់ទាំងនោះហើយបានជំរុញឱ្យខ្ញុំត្រូវធ្វើយ៉ាងណាត្រូវរៀនបន្តឱ្យចប់ថ្នាក់ទី១២ ដោយមើលឃើញពីការតាំងចិត្ដរបស់គាត់»។ ដោយចង់រើបម្រាស់ឱ្យរួចផុតពីភាពក្រីក្រ លំបាកវេទនាបែបនេះហើយ ទើបកញ្ញា ស៊ុន កញ្ញារ៉ា បានប្រឹងប្រែងជំនះឧបសគ្គគ្រប់បែបយ៉ាង ដើម្បីទទួលការសិក្សារៀនសូត្របន្ដ។
កញ្ញា ស៊ុន កញ្ញារ៉ា បានរៀបរាប់ទាំងអួលដើមកថា « បើទោះជាគាត់ (ឪពុក) ជាអ្នកធាក់ស៊ីក្លូក៏ពិតមែន តែគាត់មិនដែលធ្វើឱ្យខ្ញុំលំបាក់ យើងអត់មានទ្រព្យ ប៉ុន្តែគាត់មានទឹកចិត្ត ទោះបីជាគាត់ហត់ ទោះបីជាគាត់ត្រូវធាក់ស៊ីក្លូទាំងកណ្ដាលថ្ងៃត្រង់ដឹកភ្ញៀវ ទង្វើនេះហើយបានធ្វើឱ្យខ្ញុំឱ្យតម្លៃលើញើសគាត់មួយគ្រាប់ៗគឺមានតម្លៃសម្រាប់ខ្ញុំ ហើយញើសដែលហូរចេញពីខ្លួនគាត់គឺប្រៀបបានទៅនឹងលុយដែលខ្ញុំចាយរាល់ថ្ងៃ»។ កញ្ញាបន្តថា បើទោះជាកញ្ញាកើតមកក្នុងគ្រួសារមួយនេះ តែកញ្ញាពិតជាមានមោទនភាពចំពោះខ្លួនឯង ព្រោះខ្លួនតែទទួលបានការអបរំល្អៗ ឱ្យធ្វើជាមនុស្សល្អ រាល់ចំណុងខ្វះមិនល្អរបស់ខ្លួនលោកទាំងពីរតែជួយណែនាំជានិច្ច ឱ្យចេះគោរពអ្នកដទៃ និងមិនត្រូវភ្លេចពីដើមកំណើតខ្លួនឯងឡើយ។
បើទោះបីជាគ្រួសារជួបការលំបាកលំបិន វេទនា គ្មានទីស្នាក់អាស្រ័យបានត្រឹមត្រូវយ៉ាងណាក៏ដោយ ទឹកចិត្ដជាឪពុកម្ដាយក៏នៅតែតស៊ូបញ្ជូនកូនៗឱ្យទទួលការរៀនសូត្រគ្រប់ៗគ្នា ខណៈឃើញកូនៗបង្ហាញពីការប្ដេជ្ញាចិត្ដ និងការខំប្រឹងប្រែងសិក្សា។ ដូចគ្នានេះដែរ លោក ស៊ុន សារី មានវ័យ៧២ឆ្នាំ ប្រកបរបធាក់ស៊ីក្លូដើម្បីចិញ្ចឹមគ្រួសារ និងអ្នកស្រី ហេង ស៊ីផា វ័យ៥២ឆ្នាំ ដោយសារមិនចង់ឃើញកូនៗរស់នៅលំបាកវេទនាដូចខ្លួន និងចង់ឃើញកូនមានអនាគតភ្លឺស្វាង ទោះបីគ្រួសារក្រលំបាកវេទនាយ៉ាងណា ក៏នៅតែចង់ឱ្យកូនបានរៀនសូត្រគ្រប់ៗគ្នា។
លោក ស៊ុន សារី បានប្រាប់ថា «ក្នុងចិត្តតែងតែចង់ឱ្យកូនបានរៀនសូត្រ ទោះបីជាខ្វះខាត់ក៏នៅតែខិតខំរកបានតិចស៊ីតិចតាមដំណើរ ហើយចេះតែបន្តទូន្មានកូនឱ្យរៀនបន្ត ព្រោះឃើញកូនមានចិត្តចង់រៀនទៅហើយ»។ ចំណែកអ្នកស្រី ហេង ស៊ីផា មានវ័យ៥២ឆ្នាំ ជាម្ដាយរបស់កញ្ញា ស៊ុន កញ្ញារ៉ា បានបន្ថែមថា «កូនកញ្ញារ៉ានេះបានរៀន ពីដំបូងឡើយខ្ញុំគិតថា ស្ថានភាពគ្រួសារយើងប្រហែលជាមិនបានរៀនចប់ ឬបានត្រឹមថ្នាក់ទី៩អីហ្នឹងឱ្យកូនឈប់ ពេលនោះកូនក៏យំហើយប្រាប់ថា កូនមិនចង់ឈប់រៀនទេ ទោះបីជាក្រលំបាក់ក៏កូននៅតែតស៊ូ ដើម្បីកុំឱ្យថ្ងៃក្រោយគ្រួសារយើងមានការលំបាក់ជាងនេះទៀត»។
ដោយមានក្តីស្រម៉ៃក្នុងការចាប់យកចំណេះវិជ្ជា ដើម្បីធ្វើជាយាន្តនាថ្ងៃអនាគត ដើម្បីបានថវិកាបន្តការសិក្សារបស់ខ្លួន ក្រោយពីចប់ថ្នាក់ទី១២ភ្លាម កញ្ញា ស៊ុន កញ្ញារ៉ា បានចាកចេញពីស្រុកកំណើត ទៅធ្វើការងារនៅក្នុងហាងមួយកន្លែងក្នុងរាជធានីភ្នំពេញ ដោយធ្វើការពីម៉ោង៤ព្រឹក រហូតដល់ម៉ោង៨យប់ ពីថ្ងៃចន្ទ ដល់ថ្ងៃអាទិត្យ។ ធ្វើការបានជិតមួយឆ្នាំ កញ្ញានៅតែមិនអាចសន្សំថវិកាដើម្បីបន្តការសិក្សាបាន ទើបកញ្ញាសម្រេចចិត្តទំនាក់ទំនងស្នើសុំអាហារូបករណ៍មកអ្នកឧកញ៉ា វេជ្ជបណ្ឌិត គួច ម៉េងលី។
កញ្ញា ស៊ុន កញ្ញារ៉ា បានបង្ហើបប្រាប់ពីដំណើរដែលទទួលបានអាហារូបករណ៍ពីអ្នកឧកញ៉ា វេជ្ជបណ្ឌិត គួច ម៉េងលី ថា «នៅពេលខ្ញុំកំពុងធ្វើការនៅហាងកាហ្វេពេលហ្នឹង ជាពេលថ្នាក់ទី១២ប្រឡងចប់ហើយគឺត្រូវចូលរៀនសាកលវិទ្យាល័យ ដោយសារតែខ្ញុំអត់មានថវិកាសម្រាប់មករៀនបន្ត ទាំងដែលធ្វើការត្រូវទុកសម្រាប់ខ្លួនចាយវាយផង និងផ្ញើឱ្យអ្នកផ្ទះផង បានធ្វើឱ្យខ្ញុំខ្វះលុយសម្រាប់រៀនត ពេលនោះហើយខ្ញុំក៏បានឃើញពីសកម្មភាពជួយរបស់អ្នកឧកញ៉ា វេជ្ជបណ្ឌិត គួច ម៉េងលី ហើយនៅថ្ងៃនោះខ្ញុំក៏បានឃើញក្រុមការងារមូនិធិរបស់អ្នកឧកញ៉ា វេជ្ជបណ្ឌិត បានបង្ហោះស្វែងរកនិស្សិតដែលកំពុងស្វែងរកអាហារូបករណ៍ នៅពេលនោះហើយបានធ្វើឱ្យខ្ញុំចាប់អារម្មណ៍នឹងនឹងស្រាវជ្រាវរកព័ត៌មានភ្លាម»។ កញ្ញាបញ្ជាក់បន្ថែម «ពេលនោះហើយខ្ញុំក៏បានទំនាក់ទំនងទៅកាន់អ្នកឧកញ៉ា វេជ្ជបណ្ឌិត គួច ម៉េងលី ភ្លាមដើម្បីសួរព័ត៌មានទទួលបានអាហារូបករណ៍នេះ ដោយមើលឃើញពីការខ្វះខាត់របស់ខ្ញុំពិតប្រាកដ នឹងមានចិត្តចង់បន្តការសិក្សាជួយគ្រួសារ ខ្ញុំក៏ទទួលបានអាហារូបករណ៍មួយនេះ»។
នៅពេលទទួលបានដំណឹងថា កូនស្រីខ្លួនទទួលបានអារហារូបករណ៍ថ្នាក់បរិញ្ញាបត្រ ពីអ្នកឧកញ៉ា វេជ្ជបណ្ឌិត គួច ម៉េងលី លោក ស៊ុន សារី និងអ្នកស្រី ហេង ស៊ីផា បានបង្ហាញពីអារម្មណ៍ត្រេកអររំភើបរីករាយយ៉ាងដូច្នេះថា «កូនកញ្ញារ៉ាប្រាប់ថា ម៉ាក់ខ្ញុំជាប់អាហារូបករណ៍ ពេលនោះបានធ្វើឱ្យខ្ញុំមានអារម្មណ៍សប្បាយជាខ្លាំង ចង់ស្រក់ទឹកភ្នែក» អ្នកស្រី ហេង ស៊ីផា និយាយ។ មិនខុសអីពីអ្នកម្ដាយប៉ុន្មាននោះទេ លោក ស៊ុន សារី ដែលជាឪពុកក៏បានបង្ហាញអារម្មណ៍ថា «ខ្ញុំមានចិត្តរំភើបៗ…… ខ្ញុំពិតជាមានអារម្មណ៍ត្រេកអរខ្លាំង ហើយខ្ញុំក៏សុំអរគុណដល់ម្ចាស់អាហារូបករណ៍ដែលបានជួយ»។
ជុំវិញការទទួលបានអាហារូបករណ៍របស់កញ្ញា ស៊ុន កញ្ញារ៉ា អ្នកភូមិផងរបងជាមួយនឹងអ្នកស្រី ហេង ស៊ីផា គឺអ្នកស្រី ចាន់ សុភាព បានសម្ដែងនូវសេចក្ដីសាទរ និងអរគុណដល់អ្នកឧកញ៉ា វេជ្ជបណ្ឌិត គួច ម៉េងលី បែបនេះថា៖«ខ្ញុំសូមអរគុណដល់អ្នកឧកញ៉ា វេជ្ជបណ្ឌិត គួច ម៉េងលី ដែលបានជួយផ្ដល់អាហារូបករណ៍ដល់ក្មួយស្រី» ។
ក្រោមស្នាមញញឹម កែវភ្នែករលីងរលោង ជាមួយនឹងអារម្មណ៍ត្រេកអរឥតឧបមា កញ្ញា ស៊ុន កញ្ញារ៉ា បានសម្ដែងនូវការដឹងគុណ នឹងថ្លែងអំណរអរគុណយ៉ាងក្រែងលែង ដែលអ្នកឧកញ៉ា វេជ្ជបណ្ឌិត គួច ម៉េងលី បានផ្ដល់ឱកាសឱ្យខ្លួនបានសិក្សារៀនសូត្របន្ដ ថ្នាក់បរិញ្ញាបត្រស្របតាមក្ដីស្រមៃរបស់ខ្លួន។
«ខ្ញុំពិតជាមានអារម្មណ៍សប្បាយចិត្តមែនទែន ព្រោះនេះជាក្ដីស្រមៃរបស់ខ្ញុំគឺដើម្បីចូលរៀននៅសាលកវិទ្យាល័យ ហើយក្ដីស្រមៃមួយទៀតគឺចង់ជួយគ្រួសារ និងគិតពីអនាគតបើសិនជានៅក្នុងវ័យនេះខ្ញុំមិនបានចូលរៀន គឺអនាគតខ្ញុំមិនដឹងថាត្រូវធ្វើអ្វី» កញ្ញា ស៊ុន កញ្ញារ៉ា បន្ថែម។
សូមជម្រាបជូនថា អ្នកឧកញ៉ា វេជ្ជបណ្ឌិត គួច ម៉េងលី ត្រូវបានគេទទួលស្គាល់ចំពោះការចូលរួមយ៉ាងសកម្មក្នុងកិច្ចការងារមនុស្សធម៌ ការអភិវឌ្ឍសហគមន៍ បណ្ដុះបណ្ដាលវិស័យអប់រំ វិស័យសុខាភិបាល និងការបម្រើសេវាសង្គម ក្នុងតួនាទីជានាយកប្រតិបត្តិនៃ មូលនិធិ ម៉េងលី ជេ. គួច ដែលបង្កើតឡើងក្នុងឆ្នាំ២០០៤ផងដែរ។
គួរបញ្ជាក់ថា បើតាមរបាយការណ៍ទទួលបានពីមូលនិធិ ម៉េងលី ជេ. គួច គិតចាប់តាំងពីឆ្នាំ ២០០៤ មកដល់បច្ចុប្បន្ននេះ មូលនិធិ ម៉េងលី ជេ. គួច បានចំណាយទឹកប្រាក់ខ្ទង់ដុល្លារ ក្នុងការផ្ដល់អាហារូបករណ៍ដល់សិស្ស និស្សិត ក្រីក្រដែលរៀនពូកែ និងចង់បន្ដការសិក្សារបស់ខ្លួននិងចំណាយថវិកាចូលរួមក្នុងសកម្មភាពសប្បុរសធម៌ និងមនុស្សធម៌នានា នៅទូទាំងប្រទេសកម្ពុជា៕
