សាលា​រាជធានី​ភ្នំពេញ​៖​ ​សូម​កុំ​យកលេស​ទាមទារ​សំណង​ថ្លៃ​ខាតបង់​ពី​ម្ចាស់​កម្មវិធី​ដែល​ស្នើ​រ​សុំ​រំសាយ

យោងតាមលិខិតអំពាវនាវចេញផ្សាយថ្ងៃទី១៩ ខែមីនា ឆ្នាំ២០២០នេះ សាលារាជធានីភ្នំពេញបានអំពាវនាវឱ្យម្ចាស់អាជីវកម្មចុងភៅ ម្ចាស់អគារភោជនីយដ្ឋាន ម្ចាស់មជ្ឈមណ្ឌលជួលសម្រាប់រៀបចំកម្មវិធីទាំងអស់ក្នុងរាជធានីភ្នំពេញ សូមកុំឱ្យកាត់លុយកក់ ឬ យកលេសទាមទារសំណងនៃការខាតបង់ពីម្ចាស់កម្មវិធីដែលបានកក់ប្រាក់រួច។

នៅក្នុងលិខិតដែលត្រូវបានចុះហត្ថលេខាដោយឯកឧត្តមឃួង ស្រេង អភិបាលនៃគណៈអភិបាលរាជធានីភ្នំពេញបានសង្កត់ធ្ងន់ផងដែរថា សូមម្ចាស់អាជីវកម្មទាំងអស់នោះកុំយកឱកាសនេះដើម្បីកេងចំណេញពីម្ចាស់កម្មវិធីអាពាហ៍ពិពាហ៍ ឬពិធីជប់លៀងផ្សេងៗ ដែលបានស្ម័គចិត្តរំសាយកម្មវិធីរបស់ខ្លួនក្នុងន័យចូលរួមទប់ស្កាត់ការរីករាលដាលនៃមេរោគ កូវីដ-១៩ នៅក្នុងរាជធានីភ្នំពេញក៏ដូចជាទូទាំងប្រទេសកម្ពុជា។

សូមជម្រាបថាក្រោយការផ្ទុះរីករាលដាលនៃមេរោគកូវីដ-១៩នៅកម្ពុជាក្នុងរយៈកាលចុងក្រោយនេះ រាជរដ្ឋាភិបាលកម្ពុជាព្រមទាំងក្រសួងពាក់ព័ន្ធបានចេញសេចក្តីប្រកាសស្តីពីបម្រាមហាមជួបជុំលក្ខណៈទ្រង់ទ្រាយធំៗផ្សេងជាបន្តបន្តាប់។ ការធ្វើបែបនេះគឺដើម្បីកាត់បន្ថយអាត្រាឆ្លងមេរោគកូវីដ-១៩តាមរយៈប្រមូលផ្តុំមនុស្ស។ ឆ្លើយតបទៅនឹងវិធានការនេះ ពលរដ្ឋដែលម្ចាស់ដើមការ និងជាម្ចាស់កម្មវិធីជួបជុំធំៗផ្សេងៗមួយចំនួនក៏បានសម្រេចផ្អាកកម្មវិធីរបស់ខ្លួនផងដែរ៕

អត្ថបទ៖ រិន សុក្រិត្យ​ ប្រភព៖ រដ្ឋបាលរាជធានីភ្នំពេញ​