ឧកញ៉ា គួច ម៉េងលី ឧបត្ថម្ភ២០លានរៀលដល់យុវជនសំរាម

លោកឧកញ៉ា វេជ្ជបណ្ឌិត គួច ម៉េងលី កាលពីថ្ងៃទី១១ ខែកក្កដា ឆ្នាំ២០១៩ បានឧបត្ថម្ភ​ថវិកាដល់​ក្រុមយុវជន​ដែល​ប្រមូលសំរាម​នៅតំបន់លូទឹកស្អុយ​បឹងត្របែកដែលមានលោក​សាន ដារ៉ាវីត ជាប្រធានក្រុម។ ការឧបត្ថម្ភនេះ ត្រូវ​បាន​ធ្វើឡើង​ក្រោយពេល​លោកឧកញ៉ាបាន​ឃើញសកម្មភាពយ៉ាង​ស្វិតស្វាញ​ប្រកបដោយ​ការលះបង់ដើម្បី​​ប្រមូលនិងសម្អាត​សម្រាម​នៅតាម​លូទឹកស្អុយ​នៅក្នុង​តំបន់​បឹង​ត្របែកក្នុងរាជធានីភ្នំពេញ។

នៅក្នុងជំនួប​នាថ្ងៃនេះ​ លោកឧកញ៉ា វេជ្ជបណ្ឌិត គួច ម៉េងលី ក៏ផ្តល់យោបល់លើកទឹកចិត្ត​ឱ្យ​ក្រុមយុវជន​ដែល​ដើរប្រមូលសំរាម​នៅលូទឹកស្អុយ​បឹងត្របែកទាំងអស់​បន្តសកម្មភាព​ជាគំរូបែបនេះ​នៅតាមទីតាំងផ្សេងៗទៀតក្នុងរាជធានីភ្នំពេញ។ បន្ថែម​ពីលើ​ថវិកា​ លោកឧកញ៉ាក៏បានផ្តល់ការ​ត្រួតពិនិត្យសុខភាព​ និងព្យាបាល​ជំងឺផ្សេងនៅឯមជ្ឈមណ្ឌលសុខភាពសិស្ស​ម៉េងលី ជេ. គួច ដល់ក្រុមយុវជន​ទៅអស់​នោះ ព្រមទាំង​ឧបត្ថម្ភ​សម្ភារៈ​ប្រើប្រាស់​ផ្សេងៗសម្រាប់​ប្រមូលសម្រាម​តាមតម្រូវការជាក់ស្តែង​។ លើសពីនេះទៅទៀត លោកឧកញ៉ា​ក៏នឹងឧបត្ថម្ភ​សម្ភារៈផ្សេងៗក្នុងករណី​លោកដារ៉ាវីតបើកដំណើរការហាងកាហ្វេបរិស្ថាន​នៅតំបន់​លូទឹកស្អុយនោះ ហើយ​លោក​ក៏​បានជម្រុញ​លើកទឹកចិត្តដល់​បុគ្គលិក​លោកគ្រូអ្នកគ្រូសិស្សនុសិស្ស នៃសាលា​រៀន​ អន្តរទ្វីប អាមេរិកាំង និងមជ្ឈមណ្ឌលភាសា អេ អាយ អាយ ចូលរួមបរិច្ចាគនឹងចូលរួមក្នុងយុទ្ធនាការបោសសម្រាមនោះផងដែរ។

សូមជម្រាបថាលោកសាន ដារ៉ាវីត​គឺជាអ្នកផ្តួចផ្តើមគំនិតក្នុងការចុះ​សម្អាតនិងប្រមូលសម្រាម​ដែលកំពុងស្ទះកក់កុញនៅក្នុងលូ​ទឹកស្អុយ​បឹងត្របែក។ សកម្មភាពបោសសម្រាម​បាន​ទទួលការចាប់អារម្មណ៍ពីយុវជនផ្សេងទៀត​ ដែលជម្រុញឱ្យការចូលរួមប្រមូលសំរាម​ជាបន្តបន្ទាប់។

អត្ថបទ៖ រិន សុក្រិត្យ     រូបថតដោយ៖ វ៉ង់ វណ្ណលីដា