អាណាព្យាបាលមិនគួរមើលរំលង និងសង្កេត៥ចំណុចនេះដាច់ខាត​ ពេលកូនមានអាយុ១ខែ ដល់ ៣ឆ្នាំ

ក្រោយពេលកូនតូចៗបានប្រសូតចាកផ្ទៃ មិនមែនមានន័យថាអាណាព្យាបាល​ត្រូវ​បញ្ឈប់​ការតាមដា​នសុ​ខភាព​ពួកគេឡើយ។ នេះបើយោងតាម​ការលើកឡើង​របស់​លោ​ក ឧកញ៉ា វេជ្ជបណ្ឌិត គួច ម៉េងលី ស្ថា​បនិក ប្រធានក្រុមប្រឹក្សាភិបាល និងអគ្គនា​យកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន ក្នុងកិច្ចសម្ភាសន៍​ដែល​បាន​ផ្សាយ​ដោយ MJQTV កាល​ពីពេលកន្លងទៅ។

លោកឧកញ៉ាសង្កត់ធ្ងន់​ថា កូនតូចចាប់ពីអាយុ​ ១ខែ ដល់ ៣ឆ្នាំ ជាពេលដែលអាណាព្យាបាលគួរតាមដា​ន ថា​​​​តើចំណុចណាខ្លះ​ដែលប្រក្រតី និងមិនប្រក្រតី។​ លោក​ ឧកញ៉ា វេជ្ជបណ្ឌិត គួច ម៉េងលី បានបង្ហាញ៥ចំណុច ​ដើម្បីឲ្យមាតាបិតាអាណាព្យាបាលបានកត់សម្គាល់។

១. ការស្ដាប់ ៖ ​ពេលដែលយើងទះដៃ​តើ​កូនងាកឬអត់? ពេលយើងស្រែក​ហៅ កូនបែរឬអត់? ទាំងនេះពាក់ព័ន្ធនឹងត្រចៀក ពោលគឺសម្លេង។

២. សាច់ដុំ ៖ ពេល​ដែលយើងទះដៃតើកូនវារមកឬអត់? គឺបញ្ជាក់ពីដំណើរការនៃចលនាសាច់ដុំ។

៣. ភ្នែក ៖ ពេលយើងដាក់​តុក្កតាឲ្យមើល តើកូនមើលឬអត់? គឺជាកត្តាបង្ហាញពីសុខភាព​ភ្នែក​។

៤. ការនិយាយស្ដី ៖ ពេលយើងនិយាយទៅកាន់កូនៗ តើគេអាចនិយាយឆ្លើយឆ្លង​បានឬអត់?។

៥. ការរៀន និងដោះស្រាយបញ្ហា។

ប្រសិនបើកូនតូចមាន៥ចំណុចនេះហើយអាណាព្យាបាល​ពុំចាំបាច់ព្រួយបារម្ភឡើយ ប៉ុន្តែបើមានចំណុចណាមួយ​ដែលមិនប្រក្រតីអ្នកអាច​កត់ចំណាំ​ដើម្បីយនាំយកទៅសុំការផ្ដល់​យោបល់​ពីគ្រូពេទ្យ​ជំនាញ៕

អត្ថបទ ៖ ងន ឆៃរ៉ាត់