មាន​វ័យ​ត្រឹម១១ឆ្នាំ​សោះ​ កុមារី​សម្បត្តិ​ សិរី​កា​ ក្លាយជា​ជើងឯក​គណិត​វិទ្យា​អូឡាំពិក​អន្តរជាតិ​

កុមារី​ សម្បត្តិ​ សិរី​កា​ គឺជា​សិស្ស​ថ្នាក់​ទី៥​ នៃ​សាលារៀន​ អន្តរទ្វីប​ អាមេរិកាំង​ សាខា​ម៉ៅសេទុង​។ កុមារី​តូច​នេះ​គឺជា​ម្ចាស់​ជើងឯក​មេដាយ​សំ​រឹត​តំណាង​ជាតិ​ ពី​ការប្រកួត​គណិតវិទ្យា​អូឡាំពិក​អន្តរជាតិ​នៅ​ប្រទេស​ថៃ​ប្រចាំឆ្នាំ២០១៨​ ​(International​ Junior​ Math​ Olympiad​ (IJMO​), Thai​ 2018​) ​ដែល​មាន​បេក្ខជន​ចូលរួម​ប្រមាណ៤០០នាក់​មក​ពី​បណ្តា​ប្រទេស​ធំៗ​ប្រមាណ២០ប្រទេស​។

ការប្រកួត​គណិតវិទ្យា​អូឡាំពិក​អន្តរជាតិ​(IJMO​) ​គឺជា​ការប្រកួត​ប្រជែង​ផ្នែក​គណិតវិទ្យា​លំដាប់ថ្នាក់​អន្តរជាតិ​ដែល​ត្រូវ​បាន​រៀបចំ​ធ្វើឡើង​ជា​រៀងរាល់​ឆ្នាំ​នៅក្នុង​ប្រទេស​ផ្សេង​ៗគ្នា​នៅ​ទូទាំង​ទ្វីបអាស៊ី​។

IJMO​ ​ត្រូវ​បាន​រៀបចំ​ដោយ​ ​SASMO​ ​សហការ​ជាមួយ​សមាគម​គណិតវិទ្យា​ថ្នាក់​ជាតិ​នៅ​បណ្តា​ប្រទេស​ក្នុង​តំបន់​អាស៊ី​ ដើម្បី​លើកទឹកចិត្ត​ ជំរុញ​ទេពកោសល្យ​និង​បង្កើន​សក្តា​នុ​ពល​អ្នក​គណិតវិទ្យា​វ័យក្មេង​តំណាង​ឱ្យ​ប្រទេស​របស់​ពួកគេ​។ហើយ​ដើម្បី​ទទួល​បាន​សិទ្ធិ​ចូលរួម​ប្រកួត​ IJMO​ ​មានតែ​អ្នកទទួល​បាន​មេដាយមាស​និង​ប្រាក់​ពី​ការប្រកួត​ SASMO​ ប៉ុណ្ណោះ​។

ថ្វីត្បិត​ត្រឹមតែ​មាន​អាយុ១១ឆ្នាំ​ក៏​ពិតមែន​សិរី​កា​ធ្លាប់​ឆ្លងកាត់​ការប្រកួត​គណិតវិទ្យា​ជា​លក្ខណៈ​អន្តរជាតិ​នេះ​ ចំនួន៦ដង​ហើយ​។ រាប់ទាំង​លើក​នេះ​ ​កុមារី​កូន​អ្នកជំនួញ​ មាន​ដើមកំណើត​នៅ​រាជធានី​ភ្នំពេញ​រូប​នេះ​ ​ទទួល​បាន​មេដាយមាស​ មេដាយ​ប្រាក់​និង​មេដាយ​សំរឹទ្ធិ៦លើក​រួចមក​ហើយ​។ សិរី​កា​ក៏បាន​ជំរុញ​ឱ្យ​ក្មេង​ដទៃទៀត​ខិតខំ​រៀន​មុខវិជ្ជា​គណិតវិទ្យា​ និង​ឈានជើង​ចូល​ការប្រកួត​ជា​លក្ខណៈ​អន្តរជាតិ​៕