ត្រៀមខ្លួនធ្វើអាជីវកម្ម កុំ​មើលរំលង​៤កត្តានេះឲ្យសោះ

ដើម្បីត្រៀមខ្លួន​ធ្វើអាជីវកម្មឲ្យទទួលបានជោគជ័យ​ និងមិនខាតបង់​ លោកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិប​ត្តិ នៃក្រុមហ៊ុន ម៉េងលី ជេ. គួច អេឌ្យូខេសិន បានថ្លែងថាត្រូវតែមាន៤កត្តា​នេះសិន​។

កត្តាដែលអ្នក​ចង់ចាប់ផ្ដើម​អាជីវកម្ម​មិនគួរមើលរំលង​នោះ​ត្រូវ​បាន​ លោក​ឧកញ៉ា វេជ្ជបណ្ឌិត គួច ម៉េងលី លម្អិតថាទី១ គឺចំណង់ចំណូលចិត្ត អ្នក​ត្រូវមើលថាតើក្នុងជីវិត​ត្រូវធ្វើអ្វី ក្រោយសង្កេត​ដោយម៉ត់ចត់ និងច្បាស់លាស់ហើយ គឺដល់កត្តាទី២ ស្វែងរកចំណេះដឹង ត្រូវទៅសិក្សានូវចំណ​​ង់ចំណូលចិត្តរបស់​យើង ​ទៅរកសាលា​ដែលត្រូវចំណង់ចំណូលចិត្តរបស់យើង។

ចំពោះកត្តាទី៣ ត្រូវបាន លោកឧកញ៉ា វេជ្ជបណ្ឌិត គួច ម៉េងលី សង្កត់ធ្ងន់​ទៅលើការស្វែងរកបទពិសោធ មានន័យថាក្រោយ​រៀន​ចប់​ ត្រូវទៅហាត់ការ ចេញទៅធ្វើ​ការ​យើងនឹងមានបទពិសោធ។ នៅពេល​ដែលយើងធ្វើការយូរៗទៅ​នឹងឈានដល់កត្តាទី៤ គឺក្លាយជាអ្នកជំនាញ​។ ក្រោយពេលមាន៤កត្តានេះយើងបន្តទៅធ្វើអាជីវកម្ម​គឺកម្រនឹងបរាជ័យណាស់៕

អត្ថបទ ៖ ងន ឆៃរ៉ាត់